Abdulla Şaiq adına Azərbaycan Dövlət Kukla Teatrının təşkilatçılığı ilə keçirilən  nağıl müsabiqəsinə əsər qəbulu başa çatıb.

Teatrın nəzdindəki “Oyuq” teatr-studiyasının iştirakı ilə, Təhsil Nazirliyinin “Məktəblinin dostu” layihəsi çərçivəsində reallaşan “Sənə nağıl danışım” adlı  müsabiqə 7-13 yaş arası uşaqları əhatə edib. Uşaqların evdəki vaxtlarını səmərəli keçirmələri, yaradıcılıq potensiallarını sərbəst nümayiş etdirmələri məqsədilə təşkil olunan müsabiqə aprelin 10-dan 30-dək davam edib. Müsabiqəyə 400-ə yaxın nağıl təqdim olunub.

Tanınmış yazarlardan ibarət 5 nəfərlik münsiflər heyəti hazırda nümunələri oxuyub dəyərləndirirlər. Ümumilikdə 10 nağıl müəllifinin seçiləcəyi müsabiqənin şərtinə görə, ilk iki yerin sahibini münsiflər heyəti, 3-cü qalibi isə onlayn (nağıllar Kulis.az saytında yerləşdiriləcək) səsvermənin nəticəsi təyin edəcək. 7 nəfər balaca nağılçıya isə müsabiqədə iştirak diplomları təqdim olunacaq.

İlk üçlükdə yer alan nağıllar əsasında tamaşa da hazırlanacaq. “Oyuq” teatr-studiyasının həvəskar aktyorları və teatrın peşəkar aktyor truppasının iştirakı ilə ərsəyə gələcək bu tamaşa karantin müddəti bitdikdən sonra səhnələşdiriləcək. Müsabiqənin nəticələri mayın sonunadək elan olunacaq.