Sentyabrın 3-də Rusiyanın Krasnodar diyarının Anapa kurort şəhərində 25-ci “Kinoşok” beynəlxalq film festivalı başlanıb. Ayın 10-dək davam edəcək beynəlxalq festivalda keçmiş sovet respublikaları təmsil olunur.
Rejissorlar Rafiq Əliyev və Cavid Təvəkkülün “Dərs” bədii filmi festivalın “KinoMalıŞok” müsabiqə proqramında yer alıb.
“Azərbaycanfilm” kinostudiyasından bildirilib ki, festival çərçivəsində filmimiz Anapa, Krımsk, Novorossiysk və Temryuk şəhərlərinin kinoteatrlarında nümayiş etdiriləcək.
Qeyd edək ki, “Dərs” tammetrajlı bədii filmi 2015-ci ildə Mədəniyyət və Turizm Nazirliyinin dəstəyi ilə Cəfər Cabbarlı adına “Azərbaycanfilm” kinostudiyasında lentə alınıb. Ekran əsəri məktəb həyatından, yeniyetmə məktəblilərin qarşılıqlı münasibətlərindən, dostluğa və həyata baxışlarından, bu baxışların formalaşmasından bəhs edir.
Filmin ssenari müəllifləri Elza Ağayeva və Anastasiya Volkova, quruluşçu operatoru Rauf Qurbanəliyev, quruluşçu rəssamı Fikrət Ələkbərov, bəstəkarı Tünzalə Ağayeva, icraçı prodüseri Vüsal Abbasov, prodüseri Müşfiq Hətəmovdur.
Rolları Tamerlan Ağayev, Aliyə Əliyeva, Rəşid Əliyev, Ayna Zərbəliyeva, Nazim İbrahimov, Mənsurə Əhmədova və digərləri canlandırıblar.