Beynəlxalq Türk Mədəniyyəti Təşkilatı – TÜRKSOY Qazaxıstan Respublikasının birinci Prezidenti – Elbası (milli rəhbər) Nursultan Nazarbayevin 80 illik yubileyini musiqili proqramla təbrik edib.

Layihənin icrası TÜRKSOY-un Ankaradakı qərargahından distant yolla təmin olunub.

Təbrik proqramına TÜRKSOY-un Xalq çalğı alətləri orkestri ilə bərabər, Qazaxıstanın “Korkıt” və “Sazgən sazı” folklor musiqi qrupları da qatılıb.

Proqramda Azərbaycan, Türkiyə, Qazaxıstan, Qırğızıstan, Özbəkistan, Türkmənistan, Rusiya Federasiyasının Başqırdıstan, Tatarıstan və Saxa-Yakutiya bölgələrini, Moldovanın Qaqauz Yeri muxtar bölgəsini təmsil edən 50-dək sənətçi iştirak edib.

TÜRKSOY-un musiqi layihələrinin rəhbəri Arman Nurmahamatuli tərəfindən idarə olunan proqramda sözləri Nursultan Nazarbayevə məxsus “Üş konır” mahnısı ifa olunub.

Qeyd edək ki, iyulun 6-da Nursultan Nazarbayevin 80 yaşı tamam olub. O, 30 il – (1989–2019) Qazaxıstana rəhbərlik edib.

Bu yaxınlarda koronavirusa yoluxduğu xəbər verilən Nazarbayevin artıq sağaldığı bildirilir. Bu barədə iyulun 2-də sabiq Prezidentin mətbuat katibi Aydos Ukibay məlumat verib.

6 iyul eyni zamanda Qazaxıstanın yeni paytaxtının “doğum günü”dür.

1994-cü il iyulun 6-da Qazaxıstanın Ali Soveti paytaxtın Almaatı şəhərindən Akmola (1998-ci ildən Astana) şəhərinə köçürülməsi haqqında qərar qəbul edib. 2019-cu ildən paytaxt Nur-Sultan adlanır.

Mehparə SULTANOVA
Ankara