İçərişəhərin qala divarlarının ümumi uzunluğu 900 metrdən bir az çoxdur. Onu bir mərhələdə bərpa etmək mümkün deyil. Ona görə ki, bu böyük layihədir və kifayət qədər vaxt tələb edir. Digər səbəblərdən biri də İçərişəhərdə sakinlər yaşayır və buranı turistlər ziyarət edir. Belə qərara alınıb ki, qala divarları hissə-hissə bərpa olunsun.

Bu sözləri jurnalistlərə açıqlamasında “İçərişəhər” Dövlət Tarix-Memarlıq Qoruğu İdarəsinin Aparat rəhbəri Riad Qasımov deyib.

Onun sözlərinə görə, yaxın gələcəkdə qoruq idarəsinin nəzdində Restavrasiya mərkəzi açılacaq: “Məqsədimiz Azərbaycanda ali təhsil almış gənc mütəxəssisləri həmin mərkəzə cəlb edərək onlara tarixi abidələrin bərpası istiqamətində əvəzsiz təcrübə qazandırmaqdır”.