Mədəniyyət və Yaradıcı Sənayelər Forumunun noyabrın 29-da daha bir panel sessiyasında “Dizayn sənayesinin inkişafı” mövzusu müzakirə edildi.

“Coders” şirkətinin art-direktoru Rəsul Həsənin moderatorluğu ilə gerçəkləşən paneldə “Safaroff Agency”nin rəhbəri Çingiz Səfərov çıxış edərək dizayn sənayesinin inkişaf mərhələlərindən danışdı. Bildirdi ki, çağımızda rəqəmsal dizayn daha çox özəl sektorda inkişaf edib: “Sahə üzrə Azərbaycan dilində tədris proqramları həyata keçirilir, müvafiq mərkəzlər fəaliyyət göstərir. Bu sahədə də əsas məsələ təhsildir. Ümid edirik ki, universitetlərimizdə dizayn təhsilinin inkişafına xüsusi diqqət yetiriləcək”.

Azərbaycan Dizayn Assosiasiyasının sədri Rəhim İsmayıl rəhbərlik etdiyi təşkilatın yaranma tarixindən və fəaliyyət istiqamətləri barədə məlumat verdi.

Mədəniyyət və Sənətkarlıq üzrə Bakı Dövlət Peşə Təhsil Mərkəzinin direktoru Pərviz Həmzəyev 5 nömrəli peşə məktəbi kimi tanınan mərkəzin daha çox yaradıcı sənaye üzrə kadr hazırlığı həyata keçirdiyini dedi. Kadr hazırlığının əmək bazarına hesablandığını vurğulayan natiq mərkəzdə mədəniyyət sahəsində 28 ixtisas üzrə kadr hazırlığı həyata keçirildiyini diqqətə çatdırdı. Qeyd olundu ki, operator, kino montaj, səs rejissoru, batika, moda və geyim dizayneri, qrim, xalçaçılıq, zərgərlik və s. ixtisaslar tədris edilir. Mərkəzdə iki səsyazma studiyası və inklüziv siniflər də fəaliyyət göstərir.

Çıxışlardan sonra dizayn sahəsinin inkişaf perspektivləri ilə bağlı fikir mübadiləsi aparıldı, suallar cavablandırıldı.

Lalə