“Swissotel Hotels & Resorts” mehmanxanalar şəbəkəsi Cənub-Şərqi Asiyada və Avropada fəaliyyətini genişləndirməkdə davam edir. Şirkət Bakıda lüks sinfinə aid yeni hotel tikdirmək niyyətində olduğunu bildirib.
   “Swissotel Baku” adlanacaq mehmanxananın 2015-ci ildə, tarixdə ilk dəfə təşkil olunacaq və Azərbaycan paytaxtında keçiriləcək Avropa Oyunları ərəfəsində açılması nəzərdə tutulur. Hotel bir bünövrə üzərində ucaldılan iki qüllədə yerləşəcək. Qüllələrdən biri ticarət obyektləri və restoranlar üçün ayrılacaq. 160 metr hündürlükdə ikinci qüllə isə məxsusi hotel üçün nəzərdə tutulur. Burada 150-dək nömrə, 45 apartament və 80 iqamətgah olacaq.