İndi real görünməsə də...

Türk dünyasında ümumi dil orfoqrafiyası anlayışı formalaşmalıdır. Bu istiqamətdə iradə mövcuddur və həmin məqsədə nail olacağımıza inanıram.

Türk Dil Qurumunun başqanı professor Osman Mert bu fikri Ankarada Azərbaycan Dövlət Tərcümə Mərkəzinin ərsəyə gətirdiyi “Azərbaycan dilinin orfoqrafiya lüğəti”nin türkcə nəşrinin (“Azerbaycan dilinin yazım kılavuzu”) təqdimatında çıxış edərkən səsləndirib.

Türk Dövlətləri Təşkilatı nəzdində türk dili ilə bağlı əməkdaşlıq platformasının yaradılması istiqamətində iş aparıldığını qeyd edən Osman Mert Türk Dil Qurumunun da bu istiqamətdə çalışdığını, mövzunun Azərbaycan və Qazaxıstan nümayəndələri ilə müzakirə edildiyini bildirib.

O hər dilin orfoqrafiya lüğətlərinin zaman-zaman dövrün tələblərinə uyğun yenidən nəşr edildiyinə diqqət çəkərək, Türkiyədə bu lüğətin indiyədək yeddi dəfə yeniləndiyini, axırıncı dəfə 2012-ci ildə çap olunduğunu deyib.

“Hesab edirəm ki, orfoqrafiya lüğətləri daha standart və sadə olmalıdır. Bununla bağlı fəaliyyət prosesinə media qurumları və digər müvafiq strukturlar da cəlb edilməlidir. Belə olarsa, lüğət daha geniş zəmində formalaşacaq. Biz bütün təcrübəmizi qardaş dövlətlərlə də bölüşməyə hazırıq”, – deyə Türk Dil Qurumunun başqanı vurğulayıb.

O, həmçinin Birinci Türkoloji Qurultayın (1926, Bakı) yüzüncü ildönümündə, 2026-cı ildə Azərbaycanda ikinci belə mötəbər tədbirin keçiriləcəyini deyib.

Hacettepe Universitetində keçirilən təqdimat mərasimində Dövlət Tərcümə Mərkəzinin sədri, nəşrin tərtibçisi Xalq yazıçısı Afaq Məsud “Azərbaycan dilinin orfoqrafiya lüğəti” haqqında məlumat verib.

Türkiyə Mədəniyyət və Turizm Nazirliyi və Hacettepe Universitetinin dəstəyi ilə nəşr olunan “Azerbaycan dilinin yazım kılavuzu” əsasən qardaş ölkə universitetlərinin dil, ədəbiyyat, tərcüməçilik, pedaqoji və jurnalistika fakültələrinin tələbə və müəllim heyəti üçün nəzərdə tutulub.

Hacettepe Universitetinin Tətbiqi Lüğətçilik Elmi-Tədqiqat Mərkəzinin rəhbəri professor Nurettin Demir “Azərbaycan dilinin orfoqrafiya lüğəti”nin Türkiyədə nəşrinin Türk dünyasında dil mövzusunda dialoqa töhfə verəcək təşəbbüs olduğunu bildirib.