Ağdaş Dövlət Rəsm Qalereyası və Gənclərin İnkişaf və Karyera Mərkəzi Ağdaş nümayəndəliyinin birgə təşkilatçılığı ilə şəhərin Heydər Əliyev parkında ustad dərsi təşkil olunub.

Ustad dərsində gənclər geyim üzərində rəngli boyalarla müxtəlif rəsmlər çəkiblər.

***

Qubadlı rayon Vasili Əliyev adına Mədəniyyət evi və rayon Mahmudlu kənd Mədəniyyət evinin (Sumqayıt şəhəri) birgə təşkilatçılığı ilə  “Yaşıl dünya naminə həmrəylik ili” münasibətilə  “Ekologiya və sağlam həyat” mövzusunda dəyirmi masa keçirilib.

Çıxışlarda qeyd olunub ki, ekologiya və ətraf mühitin problemləri bütün dünyanı əhatə edir. Azərbaycanda da ətraf mühitin qorunması diqqət mərkəzində saxlanılır. Ölkəmizdə bu istiqamətdə bir çox işlər görülüb, qlobal ekoloji problemlərin həllində fəal iştirak etmək üçün beynəlxalq konvensiyalara qoşulub.

Sonda mədəniyyət evlərində bədii qiraət dərnəyinin üzvləri təbiətin tərənnümünə həsr olunan şeirlər səsləndiriblər.

***

Ağstafa Dövlət Rəsm Qalereyasının təşkilatçılığı ilə rayon Heydər Əliyev adına istirahət parkında “Fırçadakı dünyam” adlı rəsm sərgisi keçirilib.

Sərgidə canlı musiqinin müşayəti ilə yerli  rəssamların, həmçinin istedadlı uşaq və gənclərin əl işləri nümayiş etdirilib. 50-yə yaxın rəsm əsərinin yer aldığı sərginin sonunda müəlliflərə fəxri fərmanlar təqdim olunub.

***

Lənkəran şəhər Heydər Əliyev Mərkəzinin təşkilatçılığı ilə "Tariximiz qürurumuzdur" layihəsi çərçivəsində Vətən müharibəsi şəhidi Kənan Axundzadənin doğum gününə həsr olunmuş tədbir keçirilib.

Lənkəran şəhər Mədəniyyət Mərkəzində gerçəkləşən tədbirdə əvvəlcə qonaqlar şəhidin şəxsi əşyalarından və fotolarından ibarət sərgi ilə tanış olublar. Kənan Axundzadənin həyat yolunu özündə əks etdirən videoçarx nümayiş olunub.

Çıxış edənlər müzəffər Ali Baş Komandan İlham Əliyevin rəhbərliyi altında Azərbaycan Ordusunun 44 günlük Vətən müharibəsində göstəridiyi qəhrəmanlıqlardan danışıblar. Bildirilib ki, Azərbaycan Ordusunun sarsılmaz qüdrəti ilə Vətənimizin bütövlüyü təmin olunub.

Sonra şəhidin anasına Heydər Əliyev Mərkəzinin rəsm studiyasında yağlı boya ilə çəkilmiş Kənan Axundzadənin portreti təqdim edilib.

Məktəblilər Vətənə və Qələbəyə həsr olunan şeirlər söyləyiblər və tanınmış müğənnilərin ifasında şəhidlər haqqında mahnılar səsləndirilib.

Hazırladı: N.Məmmədli