Mədəniyyət Nazirliyinin təşkilatçılığı ilə 2021-ci ildən həyata keçirilən “Öyrədərək öyrənirəm” ustad dərsləri layihəsi davam edir. Ötən dövrdə layihə çərçivəsində tanınmış incəsənət xadimlərinin iştirakı ilə çoxsaylı ustad dərsləri təşkil olunub.

Layihə üzrə Azərbaycan Dövlət Akademik Rus Dram Teatrının rejissoru və aktyoru Abdulla Elşadlı Füzuli Dövlət Dram Teatrında ustad dərsləri keçəcək. Rejissor eyni zamanda M.F.Axundzadənin “Aldanmış kəvakib” povesti əsasında tamaşa hazırlayacaq.

Sentyabrın 23-də Füzuli teatrında ilk ustad dərsi gerçəkləşib. Tədbirdə “Öyrədərək öyrənirəm” layihəsinin məqsəd və ideyası barədə məlumat verilib.

Teatrın quruluşçu rejissoru Nicat Mirzə Abdulla Elşadlının yaradıcılığı haqqında danışıb, bu kimi aksiyaların teatr prosesinə inteqrasiya üçün əhəmiyyətli olduğunu deyib.

Abdulla Elşadlı da layihənin əhəmiyyətini vurğulayıb, təlim və tamaşanın hazırlanma prosesindən bəhs edib.