Mədəniyyət Nazirliyinin təşkilatçılığı ilə 2021-ci ildən həyata keçirilən “Öyrədərək öyrənirəm” layihəsi davam edir. Ötən dövrdə layihə üzrə tanınmış incəsənət xadimlərinin iştirakı ilə ustad dərsləri təşkil olunub.

Layihə çərçivəsində Akademik Rus Dram Teatrının rejissoru Abdulla Elşadlı Füzuli Dövlət Dram Teatrında ustad dərsləri keçib. Onun M.F.Axundzadənin “Aldanmış kəvakib” əsəri əsasında quruluş verdiyi tamaşaya ictimai baxış olub.

Nazirliyin əməkdaşlarının da izlədiyi tamaşadan sonra layihənin əhəmiyyəti vurğulanıb, təlim və tamaşanın hazırlanma prosesindən bəhs edilib.

Rolları Emin Abışov, Asif Şirinov, Qorxmaz Qarayev, Sevinc Məmmədova, Əli Hüseynov, Elçin Məmmədov, Zamin Quliyev, Vüsal Həsənov, Qəlbinur Əhmədli, Vüqar İsmayılov və b. ifa ediblər. Tamaşanın quruluşçu rəssamı Ellinaz Balaşova, musiqi tərtibatçısı Şəms Kazımzadədir.