Dekabrın 4-də paytaxtdakı Kamera və Orqan Musiqisi Zalında Q.Qarayev adına Azərbaycan Dövlət Kamera Orkestrinin (bədii rəhbər və baş dirijor Xalq artisti Fəxrəddin Kərimov) müşayiəti ilə solist Nigar Qəhrəmanovanın (orqan) çıxış edəcəyi barədə məlumat vermişdik. Proqramda H.Şmidtin orqan və simli orkestr üçün konsert, S.İbrahimova orqan və kamera orkestri üçün konsert, N.Əliverdibəyovun “Bayatı-Şiraz” və J.Laukvikin orqan və simli orkestr üçün konserti səslənəcək.

Kamera və Orqan Musiqisi Zalında daha bir konsert proqramı dekabrın 13-də təqdim olunacaq. Mədəniyyət Nazirliyi, Diasporla İş üzrə Dövlət Komitəsi və Azərbaycan Dövlət Akademik Filarmoniyasının təşkilatçılığı ilə gerçəkləşəcək konsert Almaniyada yaşayan sənətkar soydaşımız, Əməkdar artist, tanınmış orqan ifaçısı və bəstəkar Arif Mirzəyevin yubileyinə həsr olunub. Solist qismində Kalininqrad kafedral kilsəsinin orqan ifaçısı Yevgeni Avramenko (Rusiya) çıxış edəcək. Proqramda İ.S.Bax və A.Mirzəyevin əsərləri səslənəcək.