Azərbaycan Dövlət Mədəniyyət və İncəsənət Universiteti (ADMİU) ilə Vaqif Mustafazadə adına 2 nömrəli Uşaq incəsənət məktəbi arasında qarşılıqlı əməkdaşlığın genişləndirilməsi məqsədilə görüş keçirilib.

Tədbirdə Mədəniyyət Nazirliyinin nümayəndələri, ADMİU-nun və məktəbin rəhbər və müəllim heyəti iştirak edib.

Görüş zamanı ADMİU tələbələrinin istehsalat təcrübəsi üçün məktəbdə xüsusi proqramların təşkili, caz musiqisinin tədrisinin təkmilləşdirilməsi və bu sahədə birgə layihələrin həyata keçirilməsi müzakirə olunub. Bundan əlavə, universitetin təcrübəli müəllimləri tərəfindən məktəbin şagirdləri üçün ustad dərslərinin təşkili, məktəb müəllimlərinin ixtisasartırma təlimlərinə cəlb edilməsi, həmçinin tədris proqramlarının monitorinqi və təkmilləşdirilməsi ilə bağlı razılıq əldə olunub.

Tərəflər arasında yaradıcı dərslərin keçirilməsi və tədris sahəsində əməkdaşlığın gücləndirilməsi qarşıya əsas məqsəd kimi qoyulub.