Elmira Səfərovanın 90 illik yubileyi qeyd edilib

Görkəmli pianoçu, pedaqoq, Əməkdar incəsənət xadimi, professor Elmira Səfərovanın (1934–1997) 90 illik yubileyi münasibətilə dekabrın 7-də Azərbaycan Musiqi Mədəniyyəti Dövlət Muzeyində tədbir keçirilib.

Üzeyir Hacıbəyli adına Bakı Musiqi Akademiyası (BMA) ilə birgə təşkil edilən tədbirdə muzeyin direktoru Əməkdar mədəniyyət işçisi Alla Bayramova, şöbə müdiri Xanım Abdinova, Elmira Səfərovanın tələbəsi olmuş musiqişünas, Əməkdar incəsənət xadimi, professor Zümrüd Dadaşzadə, sənətşünaslıq üzrə fəlsəfə doktoru, Əməkdar artist Elnarə Kəbirlinskaya, yazıçı-publisist, Bakı Kitab Mərkəzinin direktoru Günel Anarqızı (Elmira xanımın bacısı qızı) çıxış ediblər.

Elmira Səfərovanın həyat və yaradıcılığı, ifaçılıq və pedaqoji fəaliyyəti haqqında söz açılıb, onun Azərbaycan mədəniyyətinə töhfələrindən bəhs edilib.

Çıxışlar Elmira Səfərovanın həyat və yaradıcılıq yolunu əks etdirən slayd-şou ilə müşayiət olunub.

Tədbirin bədii hissəsində BMA-nın professorları Əməkdar müəllim Siala Sinamdzqvarişvili və Əməkdar artist Elnarə Kəbirlinskayanın tələbələri Nərmin Hüseynova, Flora Umudova, Fatimə Vəliyeva, Rəşad Ağayev, Səmra Həsənli, Faida Hüseynova, İlqarə Talıbova, Jalə Mailova, Fidan Yunus və Aysel Məmmədovanın ifalarında Azərbaycan və dünya klassiklərinin əsərlərindən ibarət konsert proqramı təqdim olunub.