- 30-12-2014
- 599
Azərbaycanın turizm imkanlarının gəlmə turizmi baxımından prioritet sayılan ölkələrdə təbliği məqsədilə Mədəniyyət və Turizm Nazirliyi tərəfindən mütəmadi olaraq ölkəmizə infotur və press-turlar keçirilir.Qazaxıstanın aparıcı turizm şirkətləri və media nümayəndələrindən ibarət 14 nəfərlik qrup üçün 28 mart - 2 aprel tarixlərində Azərbaycana səfər təşkil edilib. Səfərdən sonra Qazaxıstanın "CTC", "Kanal 31" və "TRK TAN" kanallarında ölkəmiz haqqında verilişlər yayımlanıb.
Apreldə Rusiyanın aparıcı turizm şirkətləri ilə ölkəmizdə fəaliyyət göstərən turizm şirkətləri arasında əməkdaşlığın genişləndirilməsi məqsədilə bu ölkənin nümayəndələrinin respublikamıza səfəri gerçəkləşib.
İyul-avqustda ABŞ-ın “Econews Television Series" televiziya şirkətinin heyəti Azərbaycanın turizm potensialına dair sənədli filmin çəkilməsi məqsədilə ölkəmizdə olub.
Avqustda Almaniyanın aparıcı turizm şirkətləri nümayəndələrinin, sentyabrda isə bu ölkənin aparıcı KİV nümayəndələrinin Azərbaycana tanışlıq səfəri gerçəkləşib. Press-turun nəticəsi olaraq puriy.de bloqunda, www.gmx.net, www.mortimer-reisemagazin.de, blogstars.travelbook.de, www.gour-med.de saytlarında və “RP Online” jurnalında ölkəmizə dair məqalə və video çarxlar yerləşdirilib.
Oktyabrda İspaniyanın "Telemadrid" telekanalında yayımlanan "Madrilenos por el Mundo" (“Dünyadakı madridlilər”) proqramının bir bölməsinin Azərbaycanda yaşayan madridlilərə və turizm potensialımıza həsr olunması məqsədilə çəkiliş qrupu ölkəmizdə olub.
Ümumilikdə il ərzində keçirilən info tur və press-turlarda 27 turizm şirkətindən 29 nəfər və 17 KİV-dən 22 nəfər iştirak edib. Bu turlar müxtəlif ölkələrin turizm şirkətləri ilə əlaqələrin qurulması, xarici turizm şirkətləri tərəfindən ölkəmizə turların satışının təmin edilməsi və təbliğat kampaniyalarının təşkili baxımından əhəmiyyətlidir.
