Azərbaycan Respublikasının Prezidenti İlham Əliyev noyabrın 4-də Şəki rayonuna səfəri zamanı “Marxal” müalicə-istirahət kompleksində tikinti işlərinin gedişi ilə tanış olub. Kompleks rayonun Kiş kəndi yaxınlığında Böyük Qafqaz dağlarının cənub-qərb yamaclarında gözəl təbiət qoynunda inşa edilir.
Dövlət başçısının 2012-ci ildə imzaladığı sərəncamdan sonra başlayan inşaat işləri sürətlə davam etdirilir. Ərazisi 30 hektar olan kompleksdə 412 yerdən ibarət 178 otaqlı yeddimərtəbəli mehmanxana binası inşa olunur. Burada 126 birotaqlı, 52 ikiotaqlı nömrələr olacaq.
Kompleksdə 250 nəfərlik restoran, lobbi bar, 6 ticarət mağazası, 2 kinoteatr zalı, konfrans, uşaqlar üçün əyləncə zalları qonaqların ixtiyarında olacaq. Bundan əlavə, 600 nəfərlik restoran, 40 nəfərlik yay kafesi, həmçinin 164 yerlik 27 ikimərtəbəli kottec də olacaq.
Prezident hazır kotteclərdə yaradılan şəraitlə də tanış olub. Kotteclərin hər biri müasir standartlar səviyyəsində inşa olunub. Burada yaradılacaq süni göl kompleksə xüsusi yaraşıq verəcək. Kompleksin ərazisində uşaqlar üçün su attraksionları və böyük hovuz qurulacaq. Kompleks istifadəyə veriləndən sonra burada müxtəlif əyləncə bölmələri də fəaliyyət göstərəcək. Boulinq zalı, mini futbol, tennis və basketbol meydançaları, 500 nəfərlik amfiteatr, SPA mərkəzi, qapalı hovuz, sauna, fitnes zalı, müxtəlif müalicə prosedurlarının aparılacağı otaqlar kompleksin özəlliyini daha da artırır. “Marxal” müalicə-istirahət kompleksinin inşasının gələn il başa çatdırılması nəzərdə tutulub. Kompleks istifadəyə veriləndən sonra burada 310 nəfər işlə təmin ediləcək.