Bunu bacarmaq elə də çətin deyil. Əsas o məsum varlıqları hiss edib, yaşantılarını içindən keçirib ən səmimi hisslərini ifadə edə bilməkdir. Bir də onları təmənnasız, oyunsuz sevmək, sevgi ilə qucaqlayıb hərarətli əllərlə xurmayı saçlarına sığal çəkə bilməkdir.

Bunu edib, sevgi və səadət qığılcımları saçan gözlərin təbəssümünü, balaca əllərin gur alqışını qazandınsa, demək, sən dünyanın ən zəngin adamısan. Bu hissi yaşamaq istəyən və həm də elə doya-doya yaşayan kuklaçılar yenidən balacaları, xüsusi qayğıya, diqqətə, sevgiyə ehtiyacı olan bir qrup talassemiyalı uşağı tamaşa zalına toplaya bildi. Niyyət eyni idi - uşaqlara qayğısız dünya, xos anlar bəxş etmək.
Yeni və maraqlı səhnə əsərləri ilə yanaşı, sosial baxımdan vacib layihələrə də imza atan Dövlət Kukla Teatrı bu dəfə də maraqlı aksiyası ilə yadda qaldı. Teatr yetişən nəslin estetik tərbiyəsi, incəsənətə sevgi ruhunda formalaşması ilə bərabər, onların fiziki sağlamlığı, eləcə də müəyyən irsi xəstəliklərin daşıyıcısı olan uşaqların cəmiyyətə inteqrasiyasına dəstək vermək kimi bir missiyanı da yerinə yetirməkdədir.
Belə xeyirxah tədbirlərdən biri də fevralın 5-də gerçəkləşdi. Teatr Qan Donorları Assosiasiyası və Azərbaycan Talassemiya Federasiyası ictimai birlikləri ilə birgə Heydər Əliyev Fondunun prezidenti Mehriban xanım Əliyevanın təşəbbüsü ilə 2005-ci il fevralın 8-də başlanan “Talassemiyasız həyat naminə” layihəsinin 10 illik yubileyi münasibətilə eyniadlı xeyriyyə aksiyasını keçirdi.
Mədəniyyət və Turizm, Səhiyyə nazirliklərinin də dəstək verdiyi tədbirin təşkilində məqsəd irsi qan xəstəlikləri, onların profilaktikası və ümumilikdə cəmiyyətin bu problemə diqqət yönəltməsini təmin etmək idi. Bu yolda maarifləndirmə işinə də töhfə olan tədbirdə 100-dən çox irsi qan xəstəliyinin daşıyıcısı olan uşaq və yeniyetmə iştirak edirdi.
Səhiyyə təşkilatları təmsilçilərinin, mədəniyyət və incəsənət adamlarının, ictimaiyyət nümayəndələrinin də qatıldığı tədbirdə çıxış edənlər belə aksiyaların cəmiyyətimiz üçün önəmindən danışdılar. Bildirildi ki, ölkə üzrə hər 12 nəfərdən biri bu xəstəliyin daşıyıcısıdır. Buna görə Heydər Əliyev Fondunun prezidenti Mehriban xanım Əliyevanın səyi nəticəsində bu xəstəliklə mübarizə üçün “Talassemiyasız həyat naminə” layihəsi hazırlanıb və əsas məqsəd cəmiyyətdə talassemiyanın həlledilməz problem olmadığını göstərmək, xəstələrə qayğı və diqqəti əsirgəməməkdir.
Bu məsələni daim diqqətdə saxlayan Heydər Əliyev Fonduna təşəkkürünü bildirən Dövlət Kukla Teatrının direktoru Rəşad Əhmədzadə sənət ocağında belə xeyriyyə tədbirlərinin artıq ənənə halını aldığını və gələcəkdə də davam etdirəcəyini bildirdi.
Əməkdar artistlər Hüsniyyə Mürvətova, Səlim Abbasov, aktyorlar Elnur Kərimov və Ülviyyə Əliyeva, eləcə də qurum təmsilçiləri dövlətimiz tərəfindən talassemiyalı xəstələrə göstərilən diqqət və qayğıdan danışdılar. Vurğulandı ki, hər bir təşkilat könüllü şəkildə belə xəstələrin müalicəsinə qoşulmaq üçün səyini əsirgəməməlidir.
Maraqlı və rəngarəng konsert proqramının ardınca tədbir teatrın nəzdində fəaliyyət göstərən “Oyuq“ studiyasının balaca istedadlarının ifasında “Şah və onun xudpəsənd oğlu” (müəllif Səidə Haqverdiyeva) tamaşasının nümayişi ilə davam etdi.
Komik hadisələr fonunda uşaqlara dürüstlük, dostluq və səmimiyyət aşılayan tamaşa balaca izləyicilər tərəfindən sürəkli alqışlarla qarşılandı. Uşaqlar tamaşadan sonrakı rəngarəng konsert proqramında həmyaşıdlarının səmimi etiraflarını, onlarla birlikdə gülüb-əylənmək, təhsil almaq, özlərini realizə etmək imkanlarının daşıdıqları xəstəliyə görə məhdudlaşmadığı mesajını da aldılar.
Həmyaşıdlarının uşaq məsumiyyəti və əminliyi ilə dedikləri bu sözlər, ritmik musiqilərdə, rəngarəng geyimlərin rayihəsindəki səadəti səhnədən zala elə sirayət etmişdi ki, tamaşanın bitməsinə rəğmən onlar zalı tərk etmir, xoş anların davam etməsini arzulayırdılar.
Tədbirin sonunda irsi qan xəstəliklərindən əziyyət çəkən uşaqlara günün önəmini xatırladan hədiyyələr təqdim olundu. Beləcə, uşaqların qayğısız dünyasındakı bir nağıl da sona yetdi.

Həmidə