Oktyabrın 14-də Fransanın tanınmış "Miraphone Tuba Quartett" trubaçılar kvarteti Bakı Musiqi Akademiyasının səhnəsində çıxış edəcək. Konsert Fransanın Azərbaycandakı səfirliyi və Jorj Sand adına Fransa Mədəniyyət Mərkəzinin dəstəyi ilə keçiriləcək. Paris Milli Konservatoriyasının musiqiçiləri tərəfindən 1995-ci ildə yaradılmış "Miraphone Tuba Quartett" qrupunun bu il 15 ili tamam olur. Ötən illər ərzində qrup ABŞ, Kanada, Finlandiya, Yaponiya da daxil olmaqla, dünyanın 15 ölkəsində 200-dən çox konsert proqramı ilə çıxış edib. Bu, kvartetin Bakıya ilk səfəridir.