Azərbaycan Respublikasının Nazirlər Kabineti yanında Tərcümə Mərkəzi gənc yazıçı və şairlərin bədii əsərlərindən ibarət “Ən yeni ədəbiyyat” adlı antologiya hazırlayır.
Tərcümə Mərkəzindən bildirilib ki, toplunun redaksiya heyətinin ilk toplantısı keçirilib. Tərcümə Mərkəzinin direktoru, yazıçı Afaq Məsud, ədəbi tənqidçilər Vaqif Yusifli, Əsəd Cahangir, Rüstəm Kamal, mərkəzin elm, təhsil və mədəniyyət şöbəsinin müdiri, yazıçı Yaşar Əliyev, ədəbi-bədii mətnlər üzrə dil mütəxəssisləri Mahir Qarayev və Etimad Muradovun iştirak etdiyi toplantıda antologiyanın tərtib prinsipləri, kitabda yer alacaq müəlliflərin və onların bədii mətnlərinin seçim meyarları barədə müzakirələr aparılıb.