Azərbaycan Dövlət Gənc Tamaşaçılar Teatrında yeni tamaşanın hazırlıq prosesləri yekunlaşmaq üzrədir. Rus dramaturqu Yevgeni Şvartsın “Qırmızı papaq” əsəri əsasında hazırlanmış eyniadlı tamaşanın premyerası martın 15-16-da nümayiş etdiriləcək.
Tamaşaya teatrın baş rejissoru, Əməkdar incəsənət xadimi Bəhram Osmanov quruluş verib. Bəstəkar Əməkdar incəsənət xadimi Sərdar Fərəcov, quruluşçu rəssam Elşən Sərxanoğludur. Səhnə əsərini rus dilindən tərcümə edən Nigar Həmidova, rəqslərin quruluşçusu Vüsal Mehrəliyevdir.
Novruz bayramı ərəfəsində nümayiş etdiriləcək tamaşada Əməkdar artist Almaz Mustafayeva, aktyorlar Məsumə Babayeva, Hüsniyyə Əhmədova, Xalidə Əliməmmədova, Günel Məmmədova, Səbinə Məmmədova, Ədalət Əbdülsəməd, Müşfiq Əliyev və başqaları rol alıb.