Nəcəf bəy Vəzirov adına Lənkəran Dövlət Dram Teatrının baş rejissoru Tural Mustafayev iyunun 2-dən 28-dək Moskvada Rusiya Teatr Xadimləri İttifaqının təşkil etdiyi VIII beynəlxalq yay teatr məktəbində iştirak edəcək. Rejissor Rusiya Federasiyası Mədəniyyət Nazirliyinin dəstəyi ilə həyata keçirilən layihəyə 26 ölkədən 86 gənc sənətçinin dəvət olunduğunu bildirdi. Məktəbin dinləyiciləri üçün bir ay ərzində Rusiyanın tanınmış aktyor sənəti müəllimlərinin iştirakı ilə səhnə nitqi, səhnə mədəniyyəti, səhnə hərəkəti ilə bağlı ustad dərsləri keçiriləcək, akrobatik, ritm, vokal, rus və xarici teatr tarixinə dair məruzələr oxunacaq.