Qlobal Forumun iştirakçıları üçün qala-konsert

Aprelin 27-də Heydər Əliyev Sarayında “İnklüziv cəmiyyətlərdə birgəyaşayış: çağırış və məqsəd” şüarı altında keçirilən BMT-nin Sivilizasiyalar Alyansının VII Qlobal Forumunun iştirakçıları üçün qala-konsert təşkil olunub.
Xalq artisti, professor Firəngiz Əlizadənin bədii rəhbəri olduğu “Sivilizasiyaların musiqili alyansı” adlı qala-konsertdə Azərbaycan və xarici incəsənət ustaları çıxış ediblər.
Konserti Azərbaycan Dövlət Xor Kapellası (bədii rəhbər və dirijor Xalq artisti Gülbacı İmanova) və Üzeyir Hacıbəyli adına Dövlət Simfonik Orkestri Cüzeppe Verdinin “Nabukko” operasından xorun ifası ilə açıb.
Sonra orkestr Dmitri Şostakoviçin 7-ci simfoniyasından fraqment ifa edib.
İrakli Kaxidzenin ifasında Qaetano Donisettinin “Məhəbbət şərbəti” operasından romans səslənib. Rumın vokalçısı İrina İonesku Motsartın “Sehrli fleyta” operasından ariya ifa edib.
Azərbaycan Dövlət Mahnı və Rəqs Ansamblının solistləri “Nəlbəki” milli rəqsini ifa ediblər.
Konsertdə, həmçinin Üzeyir Hacıbəylinin, Soltan Hacıbəylinin, Niyazinin, Qara Qarayevin, A.Borodinin, J.Bizenin və L.Bethovenin əsərləri ifa olunub. Proqramda Azərbaycan Dövlət Akademik Opera və Balet Teatrının solistlərinin ifaları da yer alıb.
Qala-konsertdə Türkiyənin “Mehtər” orkestri, ukraynalı vokalçı Vyaçeslav Bazir, aşıqlar qrupu çıxış edib.