Mədəniyyət və Turizm Nazirliyinin sifarişi ilə Azərbaycan, rus və ingilis dillərində Gəncə şəhərinin turist xəritəsi hazırlanıb.
   Respublikamızın ikinci ən böyük şəhəri olan Gəncə özünün tarixi-mədəni abidələri və digər infrastruktur obyektləri ilə turistlərin diqqətini cəlb edir. Turistlər bu xəritədən istifadə etməklə Gəncə şəhərinin tarixi və mədəni abidələrilə yanaşı, mehmanxanalar, restoranlar və digər zəruri obyektləri haqqında məlumatlar əldə edə biləcəklər.
   Turist xəritəsini ölkəmizdə fəaliyyət göstərən turizm informasiya mərkəzlərindən və Gəncə şəhərində fəaliyyət göstərən mehmanxanalardan əldə etmək mümkündür.
   2016-cı ildən başlanılan bu layihə çərçivəsində indiyədək Quba, Qusar, Xaçmaz və Şəkinin turist xəritələri hazırlanıb, digər şəhər və rayonların (Mingəçevir, Qəbələ, Lənkəran, Qax, İsmayıllı, Şamaxı, Bərdə) turist xəritələrinin hazırlanması üzərində işlər davam etdirilir.