Bununla əlaqədar Bakı Turizm Peşə Məktəbində açıq dərs keçirildi
   
   Noyabr ayında Polşanın paytaxtı Varşavada 12-ci "FilmAT” Film, Sənət və Turizm Festivalı keçiriləcək. Festivalda ölkəmizin nümayəndə heyəti iştirak edəcək.   
   Oktyabrın 31-də Bakı Turizm Peşə Məktəbində 12-ci "FilmAT” Film, Sənət və Turizm Festivalı çərçivəsində təşkil olunacaq elmi konfransda iştirakla əlaqədar açıq dərs keçirildi. Tədbir Mədəniyyət və Turizm Nazirliyi və İqtisadiyyat Nazirliyinin birgə təşkilatçılığı ilə gerçəkləşdi.
   Əvvəlcə məktəbin direktoru Neylüfər Kərimova Varşavada təşkil olunacaq beynəlxalq tədbir haqqında məlumat verdi. Bildirdi ki, Mədəniyyət və Turizm Nazirliyi Kinematoqrafiya şöbəsinin böyük məsləhətçisi Almaz Sultanzadə festival çərçivəsində keçiriləcək konfransda “Təhsil dövlətin dayanıqlı təməlidir” mövzusunda məruzə edəcək.
   İqtisadiyyat Nazirliyinin Dayanıqlı inkişaf şöbəsinin əməkdaşı Elnur İbrahimov BMT-nin 2030-cu ilədək Dayanıqlı İnkişaf üzrə Gündəliyinin məqsədləri haqqında geniş bilgi verdi. Vurğuladı ki, ötən ilin oktyabr ayında Prezident İlham Əliyev Azərbaycan Respublikasının Dayanıqlı İnkişaf üzrə Milli Əlaqələndirmə Şurasının yaradılması haqqında sərəncam imzalayıb. Şuranın əsas məqsədi 2030-cu ilədək Azərbaycan üçün əhəmiyyət kəsb edən, qlobal məqsəd və hədəflərə uyğun milli prioritetləri və onlara dair göstəriciləri müəyyən etməkdən, müvafiq hesabatlar hazırlamaqdan ibarətdir. Qeyd olundu ki, “2030 Qlobal İnkişaf Gündəliyi” 15 il ərzində həyata keçirilmiş Minilliyin İnkişaf Məqsədləri (2000-2015) əsasında hazırlanıb. E.İbrahimov qeyd etdi ki, Azərbaycan BMT-nin üzvü olan dövlətlərin 2015-ci ilin sentyabrında keçirilən Dayanıqlı İnkişaf Sammitində 2016-2030-cu illər üçün təsdiqlənən, 17 məqsədi və 169 hədəfi özündə birləşdirən yeni qlobal Dayanıqlı İnkişaf Məqsədlərinə qoşulub. 
   Mədəniyyət və Turizm Nazirliyinin Elm, təhsil və gənclərlə iş şöbəsinin əməkdaşı Kamran Musayev müasir dövrdə dünya təhsilinin problemləri ilə bağlı fikirlərini bildirdi, beynəlxalq aləmdə təhsilə ədalətli çıxış imkanlarından söz açdı.
   Sonra nazirliyin Kinematoqrafiya şöbəsinin böyük məsləhətçisi Almaz Sultanzadənin “Təhsil dünyanı dəyişə bilər” mövzusunda məruzəsi dinlənildi. Yaxşı təhsil əldə etmək üçün imkanlar və perspektivlər ətrafında tələbələrlə diskussiya aparıldı. Qeyd olundu ki, təhsil eyni zamanda sənayenin, kənd təsərrüfatının inkişafına kömək edir, yoxsulluğun aradan qaldırılmasında əsas vasitədir. 
   Sonda A.Sultanzadə açıq dərsin uğurla gerçəkləşməsinə görə Bakı Turizm Peşə Məktəbinin direktoruna təşəkkürünü bildirdi. 
   Qeyd edək ki, 12-ci "FilmAT” Film, Sənət və Turizm Festivalının Təşkilat komitəsi tərəfindən bu ildən etibarən müxtəlif xalqların nümayəndələrindən ibarət tələbə münsiflər heyətinin də yaradılması qərara alınıb. Festival rəhbərliyi tələbə münsiflər heyətinin Polşa, Braziliya və Azərbaycandan olan tələbələrdən təşkil edilməsini təklif edib. Bu məqsədlə Azərbaycan Turizm və Menecment Universiteti və onun tərkibində fəaliyyət göstərən Bakı Turizm Peşə Məktəbinin 9 nəfər tələbəsindən ibarət münsiflər heyəti yaradılıb. Festivalda nazirliyin əməkdaşı Almaz Sultanzadə və Bakı Turizm Peşə Məktəbinin direktoru Neylüfər Kərimova iştirak edəcək. 
   
   Lalə Azəri