Amma onu çıxarmaq hələlik mümkün deyil

Alimlər yerin dərin qatlarında kvadrilyon (1 000 000 000 000 000) tondan çox almaz ehtiyatı aşkar ediblər.

“Geochemistry, Geophysics, Geosystems” jurnalında dərc olunmuş məqalədə bu almaz ehtiyatlarının yerin 144-240 kilometr dərinliyində olduğu bildirilir. Massaçusets Texnoloji Universitetinin (ABŞ) mütəxəssislərinin fikrincə, mövcud texniki imkanlar bu dərinlikdəki sərvəti çıxarmağa imkan vermir. Ən qədim almazlardan ibarət dağ tektonik süxurların altında yerləşir və onların dayağı funksiyasını yerinə yetirir. Onlar yer qabığının dərinlikləri və mantiyası boyu 320 kilometrədək yayıla bilər.

Universitetin əməkdaşı Ulrix Faulun sözlərinə görə, yerin təkində bu qədər almazın olması göstərir ki, bu mineral geoloji miqyasda geniş yayılıb və heç də ekzotik daş deyil.

Dünyada yerin təkinə ən dərin qazıntı vaxtilə Sovet İttifaqında aparılıb. İyirmi il davam edən bu qazma işləri zamanı 12 kilometr dərinliyə çatmaq mümkün olub. Geoloqlar bildirirlər ki, almaz dağının olduğu dərinliyə qədər qazıntı aparmaq yaxın gələcəkdə mümkün olmayacaq.