Yaponiyada koronavirusu qarşı mübarizəni gücləndirmək məqsədilə “Fuqaku” superkompüterindən nəzərdə tutulduğundan bir il tez istifadə olunacaq.

Superkompüter Kobe şəhərində yerləşən RİKEN İnstitutunda hazırlanır. İnstitutdan bildirilib ki, adı “Fuci dağı” mənasını verən kompüterdən universitetlər tərəfindən aparılan tədqiqatlarda istifadə olunacaq. Layihə COVİD-19-a qarşı dərman hazırlanmasını, onun iqtisadiyyata təsirini, müxtəlif simulyasiyalar aparılmasını və digər məsələləri özündə birləşdirən dörd vəzifənin həyata keçirilməsini nəzərdə tutur.

Qeyd edilir ki, RİKEN İnstitutu ilkin olaraq bu superkompüterin 2021-ci ildə tam gücü ilə istifadəyə verilməsini planlaşdırırdı. Belə ki, onun hesablama bloklarının təqribən 25 faizi hələ quraşdırılmayıb. İnstitut əməkdaşlarının bildirdiyinə görə, “Fuqaku” tam hazır olmasa da, onun hesablama sürəti vaxtilə dünyanın ən sürətli superkompüteri hesab olunan K modelini təqribən səkkiz dəfə üstələyir.

CAVİD