İl sonuna sadəcə iki gün qaldı. Yeni il bayramını və bir həftəlik tətili mənalı keçirmək istəyənlər üçün turizm şirkətləri həm ölkə daxilində, həm də xaricdə maraqlı səfər proqramları təklif edirlər.

Bayramı Azərbaycanda keçirmək istəyənlərin sayı artır

Azərbaycan Turizm Assosiasiyasının sədri Nahid Bağırovun sözlərinə görə, son illər ölkəmizdə çoxlu sayda yeni hotellərin və turizm mərkəzlərinin açılması istirahət həvəskarları üçün geniş imkanlar yaradıb. Yeni ili bu məkanlarda keçirməyə üstünlük verən ölkə vətəndaşlarının sayı da ilbəil artır. Hotel və turizm şirkətləri Yeni illə əlaqədar xüsusi paketlər hazırlayırlar. Bu paketlərin sayı və çeşidi ötən ilə nisbətən daha çoxdur. O ki qaldı tətil üçün xarici ölkələri tərcih edənlərə, həmsöhbətimizin fikrincə, məxsusi olaraq Yeni ili keçirmək üçün xarici ölkəyə getmək o qədər də sərfəli deyil. Bakıda fəaliyyət göstərən brend hotellər də Yeni il proqramları təklif edir və bu paketlərin qiymətləri Avropa qiymətlərindən ucuzdur. Yeni il ərəfəsində Avropada və başqa yerlərdə hotellərin qiymətləri 2-3 dəfə artır. Yeni illə əlaqədar Azərbaycandakı turizm şirkətləri və hotellərdə hələ ki qiymətlərin artımı müşahidə edilməyib. Ona görə də bayramı Azərbaycanda keçirmək daha sərfəlidir.

Sifarişi əvvəlcədən verənlər uduzmur

Azərbaycanın turizm sektorunun təmsilçiləri Yeni illə bağlı bir neçə ay öncədən proqramlar hazırlayıb və turist sifarişləri qəbul edirlər. Türkiyənin İstanbul şəhərinə, Uludağa, Sarıqamışa, Gürcüstanın istirahət mərkəzlərinə, Birləşmiş Ərəb Əmirliklərinə, Şərqi Avropaya, xüsusən də MDB ölkələrinə sifarişlər çoxdur.
Bayramı yerli istirahət məkanlarımızda keçirmək istəyənlər də yetərincədir. Şirkət rəhbəri deyir ki, Quba-Xaçmaz, Lənkəran-Astara, Şəki-Zaqatala və Qəbələyə maraq göstərənlər çoxdur.
Qiymət artımına gəldikdə isə, əvvəlcədən yer sifariş verənlər bu məsələdə heç vaxt uduzmurlar. Qiymətlər bayram yaxınlaşdıqca qalxır. Bu da xarici ölkələrdəki bəzi hotellərdə bayram günlərində qiymətlərin qalxması ilə bağlıdır. Yerli istirahət məkanlarımızda gecələmə qiymətlərində heç bir qiymət artımı olmasa da, bayram proqramları və yeməklərinin qiymətində bir qədər artım var.

Qəbələnin turizm mərkəzlərində möhtəşəm Yeni il şənliyi

Qəbələ rayonu son illər ən çox turist qəbul edən turizm məkanlarından birinə çevrilib. Bu, adi günlərdə olduğu kimi, bayramlarda da belədir. Rayon Mədəniyyət və Turizm Şöbəsinin müdiri Nargilə Qafarovanın sözlərinə görə, bir həftə davam edəcək bayram günlərində Qəbələyə 3 mindən çox yerli və xarici turistin gələcəyi gözlənilir. Bu məqsədlə hotel və istirahət mərkəzlərində hazırlıq işləri görülür. Kanatla gəzmək, alpinistlik etmək, motorlu xizəklərlə, at və faytonlarla qarlı meşələrə gəzintiyə çıxmaq, göllərdə qayıqla gəzmək və balıq tutmaq, meşələrdə heyvan və quş ovlamaq barədə düşünənlərin arzusu da Qəbələdə gerçəkləşəcək. Bayram günlərində qonaqların istirahətinin mənalı təşkili üçün «Qafqaz Resorte», «Qafqaz Riverside», «Qafqaz Karvansaray» və «Qafqaz Sport» hotellərində, «Qəbələnd» istirahət və əyləncə mərkəzində tanınmış musiqiçilərin iştirakı ilə konsertlər, müxtəlif əyləncəli tədbirlər keçiriləcək. Yerli və xarici turistlər Qəbələnin zəngin tarixi, müasir şəhərsalma mədəniyyəti və ləziz mətbəxi ilə də yaxından tanış olmaq imkanı əldə edəcəklər.
Hazırda rayonda irili-xırdalı 100-ə yaxın turizm-istirahət obyekti fəaliyyətdədir. Bu turizm obyektlərində gün ərzində 1800 qonağa xidmət göstərmək mümkündür.

Zaqatalaya 119, İstanbula 295 manata turlar

«Millennium Tourism & Congress DMC» şirkəti respublikanın regionlarına əhatəli proqramı olan tur təşkil edib. Şirkətin əməkdaşı Orxan Məmmədovdan aldığımız məlumata görə, 30 dekabr - 1 yanvar tarixlərində Zaqatalaya reallaşdırılacaq turda iştirakçıları çox gözəl yeni il proqramları gözləyir. Balakən, Qax, Şəki və Qəbələ rayonlarını da əhatə edəcək turun qiyməti 119 manatdır.
Bu qiymətə səfər müddətində 3 dəfə səhər, 3 dəfə günorta, 1 dəfə axşam yeməyi və 31 dekabrda bayram süfrəsi, «Olimpik» hoteldə iki gecə qalmaq, hotel daxili idman, əyləncə vasitələrindən istifadə, nəqliyyat xidməti və iki gecə diskoteka daxildir.
«Vektor travel» şirkəti isə İstanbula avtobus turu təklif edir. Şirkətin əməkdaşı Kənan Hənifəyevdən aldığımız məlumata görə, dekabrın 28-də başlayacaq səfər komfortlu avtobusla həyata keçiriləcək. Bakı ilə İstanbul arasında olan 32 saatlıq məsafəni qət etdikdən sonra iştirakçılar səfərin 1-ci günü Kapalı çarşı, Sultan Ahmet camisini, 2-ci gün Ayasofya məbədini, Yeralti şəhəri, Topqapını, Eminönünü, 3-cü gün Sirkeci, Misir çarşısı, Beşiktaş, Boğaziçini, 4-cü gün Qız qülləsini və Böyük adanı, 5-ci gün şəhərdəki ticarət mərkəzlərini və Taksim meydanını gəzmək imkanı əldə edəcəklər. Turun qiyməti 1 nəfər üçün 295 manatdır. Qiymətə nəqliyyat, hoteldə gecələmə, səhər yeməyi, gəzinti, sığorta və hədiyyələr daxildir.
Təbii ki, bu günlər turizm şirkətləri tərəfindən təklif edilən turlar çoxdur. Fərqi və sərfəli olanı özünüz seçin. Yeni iliniz mübarək!

Fəxriyyə Abdullayeva