Azərbaycan mədəniyyətinə və musiqişünaslıq  elminə itki üz verib. Tanınmış musiqişünas alim, sənətşünaslıq üzrə fəlsəfə doktoru, Əməkdar incəsənət xadimi Sürəyya Ağayeva 2024-cü il oktyabrın 19-da, ömrünün 78-ci ilində vəfat edib.

Sürəyya Xosrof qızı Ağayeva 29 aprel 1947-ci ildə Bakıda anadan olub. Ü.Hacıbəyli adına Azərbaycan Dövlət Konservatoriyasını (indiki Bakı Musiqi Akademiyası) bitirib. 1979-cu ildə Moskvada ilk dəfə Orta əsrlər yazılı mənbələri – əlyazmaların araşdırılması nəticəsində “Əbdülqadir Marağayi və onun musiqi-nəzəri irsi (XIV–XV əsrlər)” mövzusunda dissertasiya müdafiə edərək sənətşünaslıq üzrə elmlər namizədi (fəlsəfə doktoru) alimlik dərəcəsi alıb.

Azərbaycan musiqişünaslıq elminin formalaşması və inkişafına dəyərli töhfələr verən alim Orta əsrlər musiqi sənətimizin, o cümlədən muğamın tədqiqatçısı kimi mövzuya dair çoxsaylı elmi əsərlərin müəllifidir. Görkəmli musiqişünasın muğam sənəti, etnomusiqişünaslıq elmi üzrə əsərləri Azərbaycan, rus, türk, fars, ingilis dillərində çap olunub.

Sürəyya Ağayeva 1978-ci ildən Azərbaycan Bəstəkarlar İttifaqının üzvü idi. İttifaqın sədri Xalq artisti, professor Firəngiz Əlizadə ilə birgə “Azərbaycan muğam ensiklopediyası” (“Энциклопедия азербайджанского мугама”) nəşrinin həm müəllifi, həm də tərtibçisi olub. Ensiklopediya musiqişünas alimlər üçün böyük mənbədir.

Müxtəlif beynəlxalq konfranslarda iştirak edən, Azərbaycan musiqişünaslıq elminin dünyada tanınmasında mühüm xidmətləri olan alim UNESCO-nun nəzdində Ənənəvi Musiqi üzrə Beynəlxalq Şuranın (İCTM), Beynəlxalq Etnomusiqişünaslar Cəmiyyətinin üzvü idi. Müxtəlif illərdə Bakı Musiqi Akademiyasında, Türkiyənin Hacettepe və Bilkent universitetlərində müəllim işləyib, AMEA-nın Memarlıq və İncəsənət İnstitutu Musiqi tarixi və nəzəriyyəsi şöbəsinin aparıcı elmi işçisi, Bakıda keçirilən “Muğam aləmi” simpoziumlarının elmi koordinatoru və nəşr olunan materialların redaktoru olub.

Musiqi mədəniyyəti sahəsində xidmətlərinə görə “Azərbaycanın Əməkdar incəsənət” xadimi fəxri adına layiq görülən musiqişünas, TÜRKSOY-un “Türk dünyası mədəniyyətinin və incəsənətinin inkişafında xidmətlərinə görə” medalı ilə də təltif olunmuşdu.

Azərbaycan Bəstəkarlar İttifaqının sədri Firəngiz Əlizadə, ittifaqın idarə heyəti və üzvləri görkəmli alim, pedaqoq, gözəl insan Sürəyya Ağayevanın vəfatı ilə bağlı ailəsinə, yaxınlarına dərin hüznlə başsağlığı verir.

Allah rəhmət eləsin.