“Sevinc hissi ilə həmvətənlərimi təbrik edirəm. Dünya Bankı (The World Bank) ilk dəfə olaraq Azərbaycan rəssamının əsərlərini əldə edib.

Dünya Bankının Vaşinqton şəhərində yerləşən baş ofisinin direktorunun kabinetinin girişində hazırda mənim iki əsərim asılıb. Bu, bütövlükdə Azərbaycanımızın nailiyyətidir, yüksək mədəniyyətimizin və dünya birliyinə inteqrasiyasının göstəricisidir”.

Bu sözlər rəngkarlıq sənətimizin, Abşeron rəssamlıq məktəbinin canlı klassiklərindən biri, Əməkdar rəssam Eldar Qurbanova məxsusdur.

Mədəniyyət aləmimizə gələn bu müjdə, şübhəsiz ki, sevindirici və qürurverici hadisədir. Eldar müəllim “Mədəniyyət” qəzetinə bu hadisənin təfərrüatını danışdı:    

“İki ay əvvəl Dünya Bankının nümayəndəsindən zəng gəldi. Zəng edən şəxs bildirdi ki, Dünya Bankı Azərbaycan rəssamlarından birinin əsərini əldə etmək niyyətindədir. Seçim üçün bir neçə əsərimi onlara göndərməyimi istədilər. Mənzərə tabloları istədikləri üçün bu janrda olan 10 əsərimi seçib onların fotoşəkillərini göndərdim. Bir neçə gündən sonra Dünya Bankı mənə müqavilə göndərdi. Müqavilədə Dünya Bankının iki tablomu əldə etmək istəyi qeyd edilmişdi. Razılaşdıq, müqaviləni imzaladım, müqavilə ilə birlikdə tabloların özünü də çərçivəsiz halda göndərdim”.

Qeyd edək ki, Dünya Bankının seçimi çox məntiqli olub: tablolardan biri Amerikanın təbiətinin, digəri isə Azərbaycanın, Abşeron yarımadasının qəsəbələrindən birinin təsviridir.

Eldar Qurbanov “Qudzon çayının sahilləri”ni (97x97) 2002-ci ildə, “Ziğ” tablosunu (60x80) isə 2010-cu ildə çəkib.

Beləliklə, Dünya Bankının Vaşinqtondakı baş ofisində ilk dəfə Azərbaycan rəssamının əsəri göz oxşayacaq. 

Eldar Qurbanov 1948-ci il yanvarın 20-də Bakıda anadan olub. Əzim Əzimzadə adına Azərbaycan Dövlət Rəssamlıq Məktəbində və Azərbaycan Pedaqoji İnstitutunda (bədii qrafika) təhsil alıb. 1989-cu ildə Xəzəryanı respublikaların biennalesində “Şair və ilham pərisi” əsərinə görə I dərəcəli diploma layiq görülüb. Əsərləri Amerika, Avropa və Asiyanın bir sıra şəhərlərində sərgilərdə maraqla qarşılanıb. 2002-ci ildən respublikanın Əməkdar rəssamıdır.

Samirə