Şirvanşahlar Sarayında Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) həsr olunmuş “Planet ilə söhbət” adlı ekoyaradıcılıq sərgisi açılıb.

“İçərişəhər” Dövlət Tarix-Memarlıq Qoruğu İdarəsinin dəstəyi və Bakı Avropa Liseyinin nəzdində fəaliyyət göstərən “Sərhədsiz Diplomatiya” Beynəlxalq Uşaq Diplomatiyası Mərkəzinin təşəbbüsü ilə hazırlanan sərginin əsas məqsədi insanların təbiət qarşısında olan məsuliyyətini nəzərə çatdırmaqdır.

Sərgidə 8-11 yaşlı uşaqların əl işləri nümayiş olunur. Həmin əsərlər vasitəsilə uşaqların təbiətə olan sevgisi və qayğısı, eləcə də Yer kürəsinin ekoloji problemləri özünəməxsus şəkildə ifadə olunur. Sərginin “Mənim xoşbəxt dünyam” adlı bölməsində gənc yaradıcılardan hər biri, təbiətdə baş verən dəyişikliklərə və ekoloji böhrana dair öz baxışlarını fərqli formalarla təqdim edir.

Açılış mərasimində çıxış edən “İçərişəhər” Dövlət Tarix-Memarlıq Qoruğu İdarəsinin Aparat rəhbəri İntiqam Babayev, Milli Məclisin sədr müavini Musa Qasımlı, Bakı Avropa liseyinin direktoru Zülfiyyə Veysova belə tədbirlərin uşaqların ekoloji şüurunun formalaşmasında mühüm rol oynadığını vurğulayıblar.

Sərginin tamaşaçıları Şirvanşahlar Sarayının girişində yerləşən “Sülh Ağacı” instalyasiyası ilə qarşılanır. Burada nümayiş olunan əsərlər təbiətlə harmoniya içində yaşamağı, gələcək nəsillərə təmiz və sağlam bir dünya haqqında fəlsəfi düşüncələri təcəssüm etdirir.

“Planet ilə söhbət” sərgisi noyabrın 30-dək davam edəcək.