Avstriyanın “Second Records” leybl şirkəti Azərbaycanın caz ustası, Əməkdar artist  Rain Sultanovun kanadalı caz truba ifaçısı və bəstəkar Kenni Uiler (Kenny Wheeler; 1930–2014) ilə birgə “Jazz Standards Live” adlı qoşa vinil valını buraxıb.

Rain Sultanov deyib ki, bu layihənin reallaşdırılması onun həyatında böyük hadisədir: “Kenni Uiler kimi görkəmli musiqiçi ilə eyni səhnəni bölüşmək, onunla ifa etmək mənim üçün böyük şərəf idi. Onun artıq aramızda olmadığı bir vaxtda indi vinil valının buraxılması xüsusilə dəyərlidir”.

Albomda “Body & Soul”, “Blue Monk”, “Don’t Worry Baby” caz standartları, eləcə də Kenny Uillerin bəstələri yer alıb.

“Jazz Standards Live” layihəsində Rain Sultanovla (saksofon) bərabər, Azərbaycanın Əməkdar artistləri Şahin Növrəsli (piano) və Ruslan Hüseynov (bas), həmçinin Pol Klarvis (baraban) iştirak ediblər. Bu, Rain Sultanovun Avropa leybli tərəfindən buraxılan beşinci vinil valdır. Klassik vinil valların ənənələri Rain Sultanov tərəfindən 2017-ci ildə Azərbaycan təbiətinə həsr olunmuş “Inspired by Nature” layihəsi ilə ölkəmizə qaytarılıb.