- 15-04-2016
- 645
Nazir Əbülfəs Qarayevin Qətər və Küveytə səfəri bu ölkələrin mətbuatında geniş işıqlandırılıbXəbər verdiyimiz kimi, mədəniyyət və turizm naziri Əbülfəs Qarayevin rəhbərlik etdiyi nümayəndə heyəti aprelin 3-dən 6-dək Qətər və Küveyt dövlətlərində səfərdə olub. İkitərəfli görüşlərdə Azərbaycan və Körfəz ölkələri arasında mədəniyyət və turizm sahələrində əməkdaşlığın genişləndirilməsi məsələləri müzakirə olunub. Nazirin keçirdiyi görüşlər Qətər və Küveyt mətbuatında geniş işıqlandırılıb.
Qətərin “Gulf Times” qəzetində “Qətər-Azərbaycan əlaqələri müzakirə olundu” başlığı altında geniş məqalə dərc olunub. Məqalədə nazir Əbülfəs Qarayevin Qətərin iqtisadiyyat və ticarət naziri Şeyx Əhməd bin Jassim bin Məhəmməd Al-Tani ilə Doha şəhərində baş tutan görüşünə geniş yer verilir. Bildirilir ki, turizm sahəsində əməkdaşlığın müzakirə olunduğu görüşdə Azərbaycanın bu ölkədəki səfiri Tofiq Abdullayev və Qətərin Turizm Təşkilatının nümayəndələri iştirak ediblər.
“Gulf Times” qəzetinin ölkəmizə həsr etdiyi digər yazı isə “Azərbaycandan bir parça” başlığı altında nəşr olunub. Məqalədə mədəniyyət və turizm naziri Əbülfəs Qarayevin və Azərbaycan Konqreslər Bürosunun icraçı direktoru Florian Sengstschmidin Azərbaycanın turizm potensialı, mətbəxi, mədəniyyəti, tarixi ilə bağlı təqdimatına yer verilib.
Yazıda ölkəmizin qış turizmi imkanları “Şahdağ” Turizm Mərkəzinin timsalında geniş vurğulanıb, Bakıda təşkil olunan beynəlxalq tədbirlər - I Avropa Oyunları, Lüsern Dünya Turizm Forumunun Beyin Mərkəzinin toplantısı və aprel ayının 25-27-də Bakıda keçiriləcək BMT-nin Sivilizasiyalar Alyansının 7-ci Qlobal Forumu haqqında məlumatlar əksini tapıb. Hər bir turisti Azərbaycanı kəşf etməyə səsləyən məqalədə ölkəmizin tarixi-mədəni abidələri, günəşli günlərin çoxluğu və dəniz sahili, regionların əsrarəngiz təbiəti, müalicə turizmi ilə bağlı geniş imkanlar, yaradılmış ən müasir infrastruktur oxucuların nəzərə çatdırılır. Vurğulanır ki, bu gün Azərbaycanda tətbiq olunan sadələşdirilmiş viza şərtləri, Yaxın Şərq ölkələrindən Bakıya birbaşa aviareyslər, Qətər Hava Yollarının və “Fly Dubai” şirkətinin birbaşa sərnişin daşımaları qarşılıqlı səyahətləri asanlaşdıran və əlçatan edən əsas cəhətlərdir.Qeyd edək ki, Qətərin “Al-Arab” və Küveyt Dövlətinin “Al-Watan” qəzetləri də nazir Əbülfəs Qarayevin səfərlərinə geniş yer ayırıb, dərc olunan məlumatlarda ölkəmizin turizm potensialı və yaradılmış imkanlar yerli oxucuların nəzərinə çatdırılıb.
