Nazir son illər Bakıda sovet dövründə tikilmiş binaların yeniləndiyini və onların memarlıq baxımından daha gözəl görkəm qazandığını vurğuladı.
Əbülfəs Qarayev Azərbaycan ərazilərinin 20 faizinin Ermənistan tərəfindən işğalı nəticəsində minlərlə tarixi abidəmizin dağıdıldığını, qalanlarının da taleyinin naməlum olduğunu diqqətə çatdırdı: “İşğal olunmuş Dağlıq Qarabağda və ətraf rayonlardakı tarixi abidələrimizlə bağlı məsələ bizi narahat edir. Hər dəfə bu məsələni UNESCO səviyyəsində qaldırırıq. Azərbaycanda tarixi abidələrin qorunması ilə bağlı Prezident İlham Əliyevin ötən ilin dekabrında imzaladığı fərmana əsasən xüsusi qurum - Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti yaradılıb. Bu xidmət Azərbaycanın bütün regionlarında vəziyyəti təhlil edir. Bərpa olunacaq abidələrlə bağlı layihələr hazırlanmaqdadır. İşğal altındakı torpaqlarımızda olan abidələr isə, təəssüf ki, dağıdılır. Hətta bəzən Azərbaycan memarlığına aid olan tarixi abidələrimizin mənimsənilməsi, işğalçı ölkənin memarlıq məktəbinə şamil edilməsi kimi prosesləri də görürük. Bu məsələdə bütün ictimaiyyət, o cümlədən memarlar, tarixçilər də öz haqq səsini qaldırmalıdır”.
Sonra çıxış edən Beynəlxalq Memarlar İttifaqının baş katibi Tomas Voiner Azərbaycanın zəngin memarlıq ənənələri olduğunu, həmçinin bu ənənələrin müasir memarlıq üslubu ilə vəhdət təşkil edərək bu gün də yüksək səviyyədə inkişaf etdiyini bildirdi. Qeyd etdi ki, özündə Şərq və Qərb memarlıq üslublarını birləşdirən Bakının simasına daha da gözəllik bəxş edən müasir binaların tikilməsi təqdirəlayiqdir. Baş katib artıq ikinci dəfədir ki, Bakıda keçirilən bu memarlıq müsabiqəsinin yüksək səviyyədə təşkil olunduğunu vurğuladı.