Azərbaycanın Əməkdar artisti, Rusiya Böyük Teatrının solisti Çinarə Əlizadə Finlandiyanın Laxti şəhərindəki “Sibeliustalo” konsert zalında keçirilən “Rus balet ulduzları” festivalında iştirak edib.
   Festivalda Böyük Teatrın, Mariinski, Mixaylovski teatrlarının balet truppaları yeni proqram təqdim ediblər. Proqramda həm klassik, həm də müasir xoreoqrafiyanın ən yaxşı əsərləri yer alıb.
   Çinarə Əlizadə Moskvada doğulub. O, 1995-ci ildə Rusiya paytaxtındakı Humanitar Universitetin nəzdində Balet Akademiyasına daxil olub və Natalya Nesterovadan balet sənətinin sirlərini öyrənib. Universitetdə 3 il təhsil aldıqdan sonra 1999-cu ildə Moskva Xoreoqrafiya Akademiyasına daxil olub. Akademiyada təhsil alarkən aparıcı rollar ifa edib.
   Azərbaycanlı balerina 2005-ci ildə Moskvada Beynəlxalq artistlər və xoreoqraflar müsabiqəsində birinci yerə layiq görülüb və bundan sonra Böyük Teatrın balet truppasına dəvət alıb.