Dekabrın 12-də Akademik Opera və Balet Teatrında Azərbaycan Bəstəkarlar İttifaqının sədri, Xalq artisti, professor Firəngiz Əlizadənin “İntizar” operasının tamaşası keçiriləcək.
2014-cü ildə yeni redaksiyada tamaşaçılara təqdim olunan opera bütün zamanlar üçün aktual olan bir mövzuya - Xeyir və Şər qüvvələr arasında mübarizəyə həsr edilib. Operanın libretto müəllifi professor Nərgiz Paşayeva, yeni redaksiyanın rejissoru Əməkdar incəsənət xadimi Hafiz Quliyev, dirijoru beynəlxalq müsabiqələr laureatı Əyyub Quliyev, səhnə tərtibatçısı Xalq rəssamı Tahir Tahirovdur.
Rolları Xalq artisti Qərinə Kərimova, əməkdar artistlər Gülnaz İsmayılova, Fərid Əliyev, Səbinə Vahabzadə, Fəridə Məmmədova, Əkrəm Poladov və başqaları ifa edəcəklər.