Rusiya mətbuatında Bakının cazibədarlığı və turizm imkanları haqqında məqalələr dərc olunub
   
   Rusiyanın “Business traveller” səyahət jurnalında Azərbaycanın turizm imkanlarından bəhs edən məqalə dərc edilib. “Ağ şəhər” başlıqlı məqalənin müəllifi Anna Semida qeyd edir ki, Rusiya vətəndaşları üçün Azərbaycan Asiya ilə assosiasiya edilsə də, bu gün Bakı Avropaya daha çox yaxındır. Turistlərin Heydər Əliyev Beynəlxalq Hava Limanından başlanan təəssüratları Bakının mərkəzinə doğru getdikcə daha da zənginləşir. 
   Məqalədə paytaxtımızın yeni yolları, taksi xidmətləri, şəhərdəki ərəb turistlərin sayının çoxluğu xüsusi vurğulanır. Qeyd edilir ki, Şərq ölkələrindən turist axınının əsas səbəbi Azərbaycanın müsəlman ölkəsi olaraq tolerant və azad dünyəvi baxışının olmasıdır.
   Yazıda bildirilir ki, Bakı Asiya şəhəri olsa da, komfortu və öz müasir koloriti ilə Avropanı xatırladır. Məşhur “Əli və Nino” romanından sitat gətirən müəllif əsərin qəhrəmanı Əlinin o dövrdə öz doğma diyarını Asiya ilə Avropanın birləşdiyi məkan adlandırdığını yada salır.
   İçərişəhərin əsrarəngiz gözəlliyi, həmçinin Bakının uğurla ev sahibliyi etdiyi I Avropa Oyunları, “Formula - 1” Qran-pri yarışları, Dünya Şahmat Olimpiadası haqqında məlumat da məqalədə yer alıb. “İlk neft buruğu, Nobellərin Azərbaycanda fəaliyyəti, “Ağ şəhər” layihəsi, dəbdəbəli hotellər, hündür binalar və müasir arxitektura bütün bunlar gözqamaşdıran Bakının simasıdır”, - deyə yazıda vurğulanır.
   Dənizkənarı Milli Parkı paytaxtımızın vizit kartı adlandıran müəllif Dövlət Bayrağı meydanını, “Alov qüllələri”ni şəhərin yeni simvolları kimi təqdim edir. Onu da xatırladır ki, rusiyalı turist Bakıda səfərdədirsə, mütləq “Brilliant əl” filminin çəkildiyi küçəni ziyarət edəcək. 
   Məqalədə Azərbaycanın milli adət-ənənələri də diqqətdən kənarda qalmır, çay mədəniyyətimizin özünəməxsusluğu xüsusi qeyd edilir.
   Yazının “Ağ futurizm” yarım başlığında müəllif Heydər Əliyev Mərkəzinin möhtəşəmliyindən söz açır: “Hər şəhərə “ulduz arxitektor” nümunələr qismət olmur. Bakını bu səbəbdən bəxti gətirən şəhərlərdən saymaq olar”.
   Bakıda olarkən nəyə baxmalı və harada yaşamalısan sualına cavab olaraq müəllif Qız qalası və “Qobustan” Milli tarixi-bədii qoruğunu və “Holiday İnn Baku”, “Boulevard Hotel” və “Autograph Collection by Marriott” hotellərini nişan verir. Yazıda həmçinin “Şahdağ” Turizm Mərkəzinin imkanları haqqında da məlumat verilir.
   * * *
   Rusiyanın roomguru.ru saytında da paytaxtımızın turistlər üçün əlverişli istiqamət olmasından bəhs edilir. Bildirilir ki, Bakı rus turistlər arasında ən populyar istiqamətlərdən olaraq qalır. Paytaxtımız bu ilin nəticələrinə əsasən MDB ölkələri üzrə turizm həvəskarlarının ən çox müraciət etdiyi ilk beşlikdə yer alıb. Reytinq siyahısı hotel axtarışları üzrə yekun hesabatda bu il yanvarın 1-dən dekabrın 31-dək olan dövrü əhatə edir. MDB və yaxın şəhərlər sırasında hotel bronlaşması üzrə reytinqdə isə Bakı 4-cü yerdə qərarlaşıb. Saytın məlumatına görə, rusiyalı turistlər Bakıda üçgünlük istirahət üçün 158 dollar xərcləməli olurlar.
   “TurStat” agentliyinin məlumatında isə 2016-ci ildə Azərbaycana səfər edən turistlərin sayının artdığı qeyd edilib. Rus turistlərin öz ölkəsində ən çox üz tutduğu şəhərlərin ilk beşliyinə isə Moskva, Sankt-Peterburq, Soçi, Kazan və Anapa daxildir.
   * * *
   “İstirahət gününü xoş və unudulmaz etmək üçün qonaqpərvər Bakını seçməyiniz məsləhətdir. Bu şəhər həyat eşqini artırır, insana xoşbəxt anlar və böyük təəssüratlar bəxş edir. Bakıya səyahət sizin həyatınızda müsbət dönüş yaradacaq. Buna görə də istirahət marşrutunuza Bakını əlavə etməkdən çəkinməyin...”
   Bu fikirlər Rusiyanın “Pobeda.aero” jurnalında paytaxtımız haqqında məqalədə yer alıb. Müəllif “İlk görüş” rubrikasında Heydər Əliyev Beynəlxalq Hava Limanının memarlıq və dizayn baxımından təkrarsızlığını qeyd edir. Müasir tendensiyalara cavab verən, memarlıq baxımından yeniliyi özündə əks etdirən möhtəşəm bina Azərbaycana gələn turistlərə ölkəyə qədəm basdıqları ilk andan xoş təəssürat bəxş edir.
   Məqalədə Bakının hər bir qonağı doğma insan kimi qəbul etməsi vurğulanır, qədimliklə müasirliyin qovuşduğu şəhərin keçmişinə ekskurs edilir. Bakı milyonçularının tikdirdikləri binalar, Şərqdə ilk operanın burada meydana gəldiyi oxucuların nəzərinə çatdırılır.
   Müəllif turistləri şəhərin gəzməli-görməli yerlərindən zövq almağa səsləyir və Bakıda əyləncəli vaxt keçirmək üçün emosiyaları cəmləməyi məsləhət görür. Yazıda ötən əsrin əvvəllərində milyonçu Murtuza Muxtarovun sifarişi ilə İosif Ploşko tərəfindən inşa edilən “Səadət sarayı” binasının tarixinə də yer verilir.
   “Milli mətbəx” rubrikasında dolma, sac qutabı, təndir çörəyi, kabablar, ağ gilas və qoz mürəbbəsi, kəklikotunun dadının özünəməxsusluğu qeyd edilir. Məqalədə Bakıda milli mətbəx nümunələri təklif edən bir çox restoranların ünvanları da göstərilib.
   “İşıqlı şəhəri daha da parlaq edən “Alov qüllələri” Bakıya bir başqa gözəllik bəxş edir. Onunla üzbəüz isə Avropa və Şərqin bir araya gəlməsini sübut edən məscid turistlərə qəribə duyğular yaşadır. Burada əksəriyyət ya rus dilində danışır, ya da bu dili başa düşür. Ona görə də Azərbaycanda rusiyalı turistlərə hər zaman kömək edəcək biriləri var”, - deyə məqalədə vurğulanır.
   Məqalədə Bakının turizm marşrutları, sərnişindaşıma xidmətləri, valyuta əməliyyatları, bir sözlə, turistləri maraqlandıran bütün zəruri suallara cavab tapmaq mümkündür.
   
   Ətraflı məlumatı aşağıdakı linklərdən əldə edə bilərsiniz:
   http://ru.sputnik.az/economy/20161207/407991484/baku-rejting-rossijskie-turisty-top.html#ixzz4SDyA1kmH
   http://www.businesstraveller.com.ru/articles/belyy-gorod/ 
   http://cdn.pobeda.aero/media/magazine/VP_11_2016.pdf
   
   Hazırladı: Lalə