Xəbər verdiyimiz kimi, 17 –27 oktyabr tarixlərində paytaxtımızda növbəti caz festivalı keçirilir. XIX Bakı Caz Festivalının açılışı yenilənmiş “Jolly Joker” məkanında olub. İlk konsertdə Braziliyadaan cazmen, bas-gitaraçı Munir Hossn və xanım ifaçılardan ibarət “ELAS” qrupu çıxış edib.

açılışa çoxsaylı mədəniyyət xadimləri və caz həvəskarları toplaşıblar. Gecəni caz proqramları və festivallarının tanınmış aparıcısı Tofiq Həsənsoy açıb. Daha sonra festivalın təşkilatçısı və bədii rəhbəri Rain Sultanov və Braziliyanın Azərbaycandakı fövqəladə və səlahiyyətli səfiri Manuel Monteneqro çıxış ediblər.

Səhnəyə çıxan Munir Hossn Azərbaycanda olmaqdan və caz festivalında iştirak etməkdən şad olduğunu bildirib. Sənətçi dəvətə və səmimi qəbula görə təşkilatçılara təşəkkür edib.

Braziliyalı basçı ilə birlikdə ELAS qadın qrupu çıxış edib: Mayte Gonzales (piano), Mariana Pilatos (fleyta), Yissi Qarsiya (zərb alətləri), Mişel Velkons (zərb alətləri). Konsert başa çatdıqdan sonra braziliyalı sənətçi azərbaycanlı musiqiçilərlə birlikdə cem-sessiya təşkil edib.

Munir Hossn müxtəlif mükafatlara layiq görülmüş braziliyalı prodüser, bəstəkar və multiinstrumentalçıdır. Hossnun yaradıcılığı “Qremmi” mükafatına namizəd olan albomlarda yer alıb. Onun həmmüəllifləri arasında Quinci Cons, Ermeto Paskual, Jilberto Jil, Ceykob Kollyer, Maro, Ibrahim Maaluf, Konça Buyka, Nella, Co Zavinul Sindikat, Didye Lokvud, Alfredo Rodrigez və başqaları var.

Rain Sultanov AZƏRTAC-ın müxbirinə “XIX Baku Jazz Festival”ına hazırlığın necə getdiyini və gözləntilər barədə danışıb.

“Festivala hazırlıq yanvar ayından gedir: bu, uzunmüddətli, çətin və məsuliyyətli prosesdir. Ümid edirəm ki, biz hamıya yaxşı, caz əhvali-ruhiyyəsini çatdıra bilərik. Bizim üçün hər kəsə bu enerjini, yaxşı gözəl musiqi dalğasını ötürmək çox vacibdir.

Gecənin Braziliya musiqisinin konserti ilə açılması təsadüfi deyil. Bu, bizim festivala çox uyğun olan çox ehtiraslı musiqidir. Xüsusilə də onun açılışı üçün. Munir Hossn çox orijinal musiqiçidir və o, bu gün bizə maraqlı qadın qrupu təqdim edəcək. Bayrama daha nə lazımdır!” – deyə həmsöhbətimiz vurğulayıb.

Qeyd edək ki, 11 ölkədən ifaçı və kollektivləri bir araya gətirən festivalın konsert və təqdimatları Jolly Joker, Beynəlxalq Muğam Mərkəzi, Milli Konservatoriya, ADA Universiteti və Caz-klubda keçiriləcək.