Heydər Əliyev Fondu və Mədəniyyət Nazirliyinin təşkilatçılığı, Heydər Əliyev Mərkəzi və Bakı Media Mərkəzinin dəstəyi ilə çəkilən “Şuşa” adlı film “Stigmart” musiqili yayım platformasında yerləşdirilib.

Beynəlxalq layihə olaraq “Altea Media” şirkəti tərəfindən çəkilən film Azərbaycanın mədəniyyət paytaxtı Şuşa şəhərinin və klassik musiqi irsimizin dünyada təbliği məqsədi daşıyır.

Filmdə Şuşa ilə bağlı arxiv materialları və şəhərin müasir görüntüləri Xalq artisti Murad Hüseynovun pianoda Fikrət Əmirov, Qara Qarayev, Tofiq Quliyev, Adil Bəbirov kimi görkəmli bəstəkarların əsərlərinin ifası ilə müşayiət olunur. Eyni zamanda Qarabağ xalçaları və Xalq rəssamı Arif Hüseynov, gənc rəssamlar Leyla Əliyeva və Anar Hüseynzadənin əsərləri təqdim edilir.

Filmdə AzTV, Milli Arxiv İdarəsi və “Azərxalça” ASC tərəfindən təqdim edilmiş materiallardan istifadə olunub. “Şuşa” musiqili filminin məşhur musiqi kanalı “Mezzo TV”də də yayımlanması nəzərdə tutulur.