Homerin eposu əsasında yeni film çəkiləcək

Əfsanəvi yunan şairi Homerə aid edilən “Odisseya” epik poeması əsasında yeni film çəkiləcək. Bu dəfə mövzuya italiyalı rejissor Uberto Pazolini girişəcək. 

“Qayıdış” adı verilən filmin ssenarisini Con Kolli və Edvard Bond yazıblar. Kinolayihə hələ 2022-ci ilin aprelində anons olunsa da, çəkilişlərə 2024-cü ildə başlanılacağı bildirilir.

Yunanıstanda çəkiləcək filmdə əsas rolları ingilis aktyor Reyf Fayns və fransız aktrisa Jülyett Binoş oynayacaqlar. Onlar 9 “Oskar” mükafatı qazanmış “İngilis pasiyenti” (1996, rejissor Entoni Mingella) filmində tərəf-müqabil olublar.

Ekran əsəri İtaliya, Yunanıstan, Böyük Britaniya və Fransanın birgə istehsalı olacaq. Prodüser Ceyms Kleytonun sözlərinə görə, belə “Odisseya”nı kinosevərlər hələ görməyiblər. Filmdə tanrılar və bədheybətlər əhatəsindəki mifik qəhrəman deyil, illərin travmasını özündə daşıyan döyüşçü obrazı təsvir olunacaq. Baş qəhrəman Odissey 20 ildən sonra doğma adaya geri dönür, indi onu yeni sınaqlar gözləyir. O, yaxınlarını xilas etmək üçün yenidən zorakılığa əl atmağa məcburdur.

Qeyd edək ki, Homerin “Odisseya”sı kino sənəti meydana çıxandan bəri dəfələrlə bədii, eləcə də animasiya filmlərinin mövzusu olub. İlk kino nümunəsi 1911-ci ildə İtaliyada lentə alınıb. Bu silsilədə italyan rejissor Mario Kamerininin 1954-cü ildə çəkdiyi film və rus rejissor Andrey Konçalovskinin Hollivudda işləyərkən 1997-ci ildə ekranlaşdırdığı ikiseriyalı “Odisseya” (çəkilişlərin bir hissəsi Türkiyədə aparılmışdı) daha çox məşhurdur.

V.Kamal