Şəfəq SAHİBLİ
  
   Qolların qoynunda,
   gözlərin əllərdə
   kiçilmə, qadın,
   kiçilmə, Ana!
   Aç ürəyinin pərdəsini
   görünsün o üzü.
   Yandırsın görəni
   ürəyinin közü.
   kiçilmə, qadın,
   kiçilmə, Ana!
   Qurtarmaz nadanın sözü,
   düşərsən yaman dillərə
   kiməsə Ana.
   kiməsə bacı,
   bir kişinin qızı -
   Nadan əydi,
   sən əyilmə,
   qadın qürurunu
   tut ucalardan uca.
   Yavanlıq elə
   göynəyən mədənə,
   kiçilmə-kiçilmişlərə.
   kiçilmə, qadın,
   kiçilmə, Ana!
   Bəbəklərin, zülmlərin
   zülməti.
   Yarpaq-yarpaq
   əllər uzanar.
   al yanaqlara,
   amma silməz,
   görməz
   içinə axan
   göz yaşlarını.
   kiçilmə, qadın,
   kiçilmə, Ana!
   kiçilmə, nadanlara,
   özünü dananlara,
   kiçilmə
   ağlıkor gəzənlərə.
  
    Oldun
  
   Sənə baharım dedim,
   Gülüm, güllərim soldu!
   Sənə həyatım dedim,
   Həyatım qüssə oldu.
  
   Qoparma yaraları,
   Harayıma dözməzsən.
   Nə üçün öldüyümü,
   Sən ki, unuda bilməzsən.
  
   Tabutum göydə gedər,
   Əllərin çatmaz ötər.
   Sənin də ömrün bitər,
   Mənim arxamca, gülüm!
  
   Ömrümə tikan oldun,
   Qəlbimə məkan oldun.
   Diriykən hər günümə,
   Kəfəni biçən oldun.
  
  
    * * *
  
   Diriykən
   kəfənimi biçdin.
   Günahsız
   günahımı içdin.
   Kimi kimdən
   asıb keçdin.
   Ölümümə sevinən
   günün mübarək.   

   * * *
  
   Düşmən əlimi,
   Dost ürəyimi
   Sıxır!
  
  
    * * *
  
   Yaşadığım illərə
   söylə,
   qayıtmaq olarmı!
   Qayıtsam nə dəyişər
   Səni unudum deyə,
   yaşanmışları
   unutmaq,
   silmək olarmı.
   Mən elə zirvədən -
   yıxılmışam ki,
   nə təbib!
   nə loğman!
   Tanrım belə
   aciz qarşımda.
   Qalsaydım əvvəlki
   sədaqətimdə
   o illərimdə.
   O ilin
   ölümünü belə
   seçərdim.
  
    Yalan
  
   Səni sevdim
   odda yandım.
   olanları
   nağıl sandım -
   bu xətamı
   çox gec qandım
   sevgi yalan
   sənmi yalan
   Xatirəm -
   ağ varaq kimi.
   Mərdə sevgi,
   bir həb kimi?!
   namərddən də
   soraq kimi.
   Sevgi yalan,
   sənmi yalan?!
   Ömrümə -
   bir ömür
   yazdın.
   Ağa qara
   qatıb yazdın
   gözlərimə -
   alov çatdın
   sevgi yalan,
   sənmi yalan?!
   Divara -
   daşa qısqandım!
   quruya -
   yaşa qısqandım!
   Demə ki -
   boşa qısqandım!
   Sənmi yalan,
   gözmü yalan?!
  
  
    * * *
  
   Bir gün gələr
   səni və sənli
   xatirələri unuduram!
   Səndə yaşadığımı,
   sənlə yaşadığımı
   unudaram!
   Yorğun bir səs
   içimdə
   Səni səsləyəcək -
   eşitməzsən.
   Bir ovuc su kimi
   içdin ömrümü.
   Nə ağır -
   zamansız sorğusuz -
   ayrılıq.